Majo

(Originala titolo: Mês de maio)
Verkis: Almir Sater k Paulo Simões
Traduko: Flávio Fonseca

Ĉiela bluo brilis,
Jam estas majo, kaj la retin'
Malfermiĝas pro
Tia kolor',
Jam estas majo,
La vivo splendas per ĉi glor'.

La suna lum' eniris
Tra la fenestro, invitis min
Al tre bela tago
Sen varmstupor',
Jam estas majo,
Mirigas min la sunfavor'.

Horizonto akvarela,
Ja nenies pentroag',
Kaj senfina aro stela
Montras, ke finiĝis tag'.

Nokto apenaŭ iĝis
Kaj venis luno kun ilumin',
Ombroj hontu tuj
Kaj iru for,
Jam estas majo,
Jen tempo revi sen angor'.

Kiu ne enamiĝis
Dum tia majo, pro la destin',
Tiu ne rezignu,
Alvenos hor'.
De la soluloj
Ja majo estas la mentor'.

Bona Tero, olda sfero,
Nin portanta al labor',
En estonto, kun espero,
Via estos la valor'.



Kantas kaj gitarludas: Flávio Fonseca

Vidu kaj elŝutu la muziktekston kun akordoj (x-sistemo).

Barĝo

(Originala titolo: Chalana)
Verkis: Mario Zan k Arlindo Pinto
Traduko: James Rezende Piton

Tiu barĝo jam foriras
Ĝis la malaper'
Ĝi navigas sur trankvila
Paragvaj-river'

REFRENO:
Nur pro vido de la barĝ'
En mi kreskas la dolor'
Post la simpla serenakva
Forkonduko de l' amor'
(refoje)

Tiel forveturis ŝi
Sen plej eta ĝisrevid'
Malaperas tiu barĝo
Post la kurb-malrapid'

Se ŝi estas korpremata
Kompreneblas ŝia plor'
Maldankeme naskis mi
Vundon funde de la kor'

(Refreno)

Vidu kaj elŝutu la muziktekston kun akordoj (x-sistemo).

Daŭrigo antaŭen

(Originala titolo: Tocando em frente)
Verkis: Almir Sater k Renato Teixeira
Traduko: Cícero Soares

Mi paŝadas lante ĉar jam tro rapidis
Portas ĉi rideton ĉar mi ploris same tro
Nun mi sentas min pli forta, pli feliĉa, eble
Kun mi la sendubo pri malmulta mia sci'
Aŭ pri nesci'

Koni pri la bandoj kaj abandon'
Pri kolor' de l' koto kaj de l' koton'
Bezonatas amo por la pulsad'
Bezonatas paco por rida son'
Bezonatas pluvo por florburĝon'

Pensas mi ke l' vivplenumo estas kon' ambaŭa:
La kompren' de l' marŝo kaj daŭrig' antaŭen
Kiel maljuna vakero dum bovkondukado
Mi irigas tagojn laŭ la longa pad' kun ĝoj'
Mi estas voj'

Koni pri la bandoj kaj abandon'...

Ĉiu homo amas iam, ĉiu homo ploras
Iam ni alvenas, poste jam ni foras
Ĉiu hom' el ni komponas sian vojon
Ĉiu mem estul' kunvivas kun naturkondiĉ'
Por la feliĉ'

Koni pri la bandoj kaj abandon'...



Kantas kaj gitarludas: Cícero Soares

Vidu kaj elŝutu la muziktekston kun akordoj (x-sistemo).

Pantanala trajno

(Originala titolo: Trem do pantanal)
Verkis: Paulo Simões k Geraldo Roca
Traduko: Flávio Fonseca

Kiam ĉi olda trajn' iras tra la Pantanal'
El la sudakrucaj steloj venas lumsignal'
Montrante, ke tiu vojo bonas plej por la hom'
Kiu fuĝas el la kolero.

Kiam ĉi olda trajn' iras tra la Pantanal'
Mia famili' atendas novaĵojn el val'
Dirante, ke mi bonfartas kaj pluiras
Al la Sankta-Kruc'-de-l'-Siero

Kiam ĉi olda trajn' iras tra la Pantanal'
Nur en mia koro estas bata malegal'
Ĝi nun scias, ke samcele vojaĝas la tim'
Sur la reloj de la tuta Tero.


Rim:
- Pantanalo = Propra nomo, regiono de la brazila provinco Mato-Groso (laŭ Vortaro Túlio Flores)
- Sankta-Kruc'-de-l'-Siero = simpla esperantigo de hispanlingva nomo de urbo en Bolivio.
- Mi decidis sekvi fidele la neperfektan metrikon de la originalo, por faciligi kantadon.



Voĉo: Alejandro Cossavella
Kamparana gitaro: Emerson Fonseca
Gitaro: Flávio Fonseca
Studio k teknikisto: 1234 (Pedro Tavares)
Filmado k muntado: Diógenes Dias

Vidu kaj elŝutu la muziktekston kun akordoj (x-sistemo).