Kanzono

(Originala titolo: Modinha)
Verkis: Sérgio Bittencourt
Traduko: Elvira Fontes

Freŝa rozo ĉe fenestro
Naskas adoleskan revon
Kaj se knabo nun mi estus
Tiu roz' ne tie restus
Mi fiere ĝin donacus
Al l' unua amatino
Kaj per tiu malmultaĵo
Ja montriĝus mia am' (ja mia am')

Jen la sun' ĉe okcidento
Naskas maturecan revon
Mia voĉ' en voĉ' de l' vento
Serĉas vian silueton
Por vers' mia ĉagrenita
Ĉu ne estas plu pardon'?
Mi min perdas vin serĉante
Kaj min trovas en kanzon'

Ve, mi mortos, amatin'
Serĉante vane vin


Rim: La partituro de tiu ĉi muzikaĵo estas disponebla ĉe Klubo Brazila Muziko.



Kantas kaj gitarludas: Flávio Fonseca

Vidu kaj elŝutu la muziktekston kun akordoj (x-sistemo).

Ĉe tiu tablo

(Originala titolo: Naquela mesa)
Verkis: Sérgio Bittencourt
Traduko: James Rezende Piton

Ĉe tiu tablo li sidiĝis daŭre
Kaj parolis daŭre pri viv' kun valor'
Ĉe tiu tablo li rakontis multon
Al mi kun singulto venas la memor'

Ĉe tiu tabl' en granda kompanio
Li rakontis ĉion laŭ propra elan'
En la okuloj estis tia brilo,
Ke krom lia filo, mi fariĝis fan'

Mi ne imagis tiom da doloro
Sen tiu sinjoro de la hejminflu'
Se mi konscius pri la vivangoro,
Dolor' de doloro ne dolorus plu

Ve, jen la tablo nun estas malplena
Kaj jam senrevena son' de l' mandolin'
Li ne troviĝas ĉe la tabloflanko,
Kaj la frapa manko suferigas min.


KURIOZAĴO: Ĉi tiun kanton Bittencourt verkis omaĝe al sia patro, la fama mandolinisto kaj komponisto Jacob do Bandolim. Ĝi fariĝis furoraĵo je la voĉoj de Elizeth Cardoso kaj Nelson Gonçalves, kaj estis registrita eĉ de la franco Paul Mauriat.

Vidu kaj elŝutu la muziktekston kun akordoj (x-sistemo).